باث اند بودي وركس

 السلام عليكم ..

طبعاً كلنا نهتم برائحتنا وودنا دائم انها تكون حلوة بس أحيانا نطيح ع المنتجات الغلط اللي ما تعطينا الرائحة اللي تثبت او تسبب لنا بعض المشاكل ..زي استخدامنا للعطور على الجسم مباشرة او الشعر صح انها حلوة وتجنن وانا من محبين العطور أصلا بس انك ما تقدري طبعا ترشيها ع الجسم او الشعر , لانك لو رشيتها بتجيب لك الشيب او الحساسية , فعني انا افضل معطرات الجسم للاستخدام اليومي المباشر وما نهمل العطور طبعا .. 

وفيه منتجات شريتها من باث اند بودي وركس  وفرت لي ذا الشيء..

عندهم روايح تجنن ومرة متنوعة يعني اكيد بتحصلي اللي يعجبك , عندهم روايح فواكه وعطور واشكال العلب مررة تجنن . 

انا عني اعجبتني رائحة سكاي واخذت منه معطر الجسم واللوشن و جل الاستحمام ..

رائحة جل الاستحمام تكون في الحمام وابد ما تثبت فمرة ثانية ما اضن اني بشتريه وحتى ما حسيت انه يعطيني ترطيب او انتعاش يعني في منتجات ثانية تعطيك اكثر  .. سعره 60

اللوشن اول ما تحطيه رائحته حلوة وتثبت اكثر من الجل بس يعني لسه الرائحة مو ذاك الثبات القوي بس انه ترطيبه حلو ,, ماافكر اشتريه مرة ثانيه لانه اعرف منتجات ترطيبها افضل ..  سعره 60 

اما بالنسبة لمعطر الجسم فهو احلى شيء جربته رايحته حلوة وثابتها افضل من الأنواع الثانية فحلو يكون متوفر دايم عندك في البيت وتاخذيه للدوام اذا حبيتي وتستخدميه مع عطرك  .. سعره 80 

في كثير مدح ع زبدة الشيا فشفتها عندهم وحبيت اجربها بس للأسف كانت سيئة وابد مو بالمستوى المطلوب ..

استخدامات الشيا كثيرة ومعروفة بترطيبها و وتحل مشكله التشققات وكثير أشياء ثانية بس اللي اخذتها من عندهم ابد ما كنت كذا ..

يعني في فرق بينها وبين زبدة الشيا اللي اخذتها من ايهرب في السعر والكفاءة والفائدة ..